Diarmaid agus Gráinne
le Micheál Mac Liammóir
"Phóg me do bhéal draoidheachta agus tá athrú ar an domhan de bharr na póige sin..."
Beidh Taibhdhearc na Gaillimhe ag léiriú leagan de dhráma Mhicheál Mac Liammóir Diarmaid agus Gráinne sa Druid Theatre ó Dé Luain an 14 Nollaig (réamhléiriú) go dtí Dé Sathairn an 19 Nollaig ag 8.00 i.n. gach oíche.
Is é Páraic Breathnach (Macnas, Killinaskully, srl.) a bheidh i mbun stiúrtha ar an gcliar ábálta agus cumasach.
Is cúis mhór áthais dúinn é go bhfuil Mick Lally ar ais ag obair sa Taibhdhearc arís agus é i mbun oibre ach go háirithe ar an léiriú seo.
Is sa Taibhdhearc, ar ndóigh, a thosaigh Mick amach ar an gceird i dtús ama agus cuirimid céad míle fáilte ar ais roimhe.
Mar dhuine de bhunaitheoirí an Druid Theatre Co. i 1975, beidh Mick ag filleadh abhaile faoi dhó an uair seo (ar an Taibhdhearc agus ar an Druid).
Nuair a bhí an Druid gan dídean roinnt blianta ó shin, thug An Taibhdhearc cuireadh dóibh a ndrámaí a léiriú sa Taibhdhearc ar an tSráid Láir. Anois agus muintir na Taibhdheirce gan dídean, táimid go mór faoi chomaoin ag an Druid agus an fháilte mhór a chuireadar romhainn i Lána an Draoi. Faoi scáth a chéile a mhaireann na daoine!
In éineacht le Mick ar stáitse beidh Eoin mac Diarmada, Áine Ní Dhroighneán, Seán McDonagh (an triúr acu ó Ros na Rún), Eoin Geoghegan (Seacht) agus Elaine Scahill.
Is í an ceoltóir cumasach Nuala Ní Chanainn a bheidh i mbun an cheoil bheo. Athbhreithniú nua físiúil ar an seanscéal a beidh i gceist anseo; léiriú a bheidh fuinniúil agus barúil. Is cinnte go mbainfidh an lucht féachana an-spraoi go deo as an taispeántas seo!