Go dTaga do Ríocht
 Dráma nua- scríofa le Micheál Ó Chonghaile.
Léiriú de chuid Taibhdhearc na Gaillimhe
Áras na Gaeilge, Ollscoil na hÉireann, Gaillimh.
Dataí: Dé Luain 14 Iúil – Dé Sathairn 19 Iúil 2008
Am: 8.00 i.n.
Ticéid €15 / €10
Dráma storrúil nua-aimseartha é Go dtaga do Ríocht a bhfuil an teannas, an t-imreas agus an ghangaid ina snaidhm reatha tríd. Tugtar léargas ann ar scéal Jimí, déagóir nach bhfuil ach i dtús aithne air féin, é cráite ag dúshláin mhóra an tsaoil – bás a mháthar, meon muiniceach a athar, éiginnteacht an ghnéis agus an chreidimh, saol agus sochaí Chonamara le hais an tsaoil atá ag a chomrádaí cathrach Kevin – Bleá Cliathach atá i gConamara ar chúrsa samhraidh.
I dteannta Jimí, castar orainn a athair – Patrickín – Finné Iáivé (Jehovah’s Witness) díocasach díograiseach arb é an chloch is mó ar a phaidrín craobhscaoileadh a chreidimh féin.
Ar cheann de shnátha eile an scéil tá an Gorta Mór agus an cogadh creidimh i gConamara aimsir an Drochshaoil a bhfuil a lorg le feiceáil ar an gcogadh creidimh atá ar siúl lenár linn féin idir Jimí agus a athair. Dráma é Go dtaga do Ríocht a bhfuil an dáiríreacht, an greann agus an ceol ina orlaí tríd.
Seo é an tríú ceann den triológ drámaí – suite i gConamara - a chum Micheál Ó Conghaile. Léirigh Taibhdhearc na Gaillimhe an péire eile cheana: Cúigear Chonamara sa mbliain 2003 agus Jude in 2007.
|
